Magtatatag ang Pamahalaang Lungsod ng Muntinlupa ng Rainbow Desk para sa proteksyon ng LGBTQIA+ community.
“Ang ating LGBTQIA+ community ay nararapat na protektahan at suportahan. Sa pamamagitan ng pagtatatag ng Rainbow Desk, mas mailalapit ang ating mga programa sa kalusugan, pag-unlad ng ekonomiya, at edukasyon upang matugunan ang kanilang mga pangangailangan,” sabi ni Mayor Ruffy Biazon.
Ang Rainbow Desk na ilalagay sa Gender and Development (GAD) Office sa City Hall ay magpapatupad ng komprehensibong mga programa, proyekto, at aktibidad para sa kapakinabangan ng LGBTQIA+ community. Kasama dito ang pagbuo ng mga patakaran, pamamahala ng datos, pagsubaybay at pagsusuri, pagtatatag ng mga pakikipag-ugnayan, at mga inisyatiba sa empowerment ng sektor.
“Isang mahalagang hakbang ang Rainbow Desk sa pagsulong ng ating lungsod, tinitiyak na bawat miyembro ng ating komunidad ay pinahahalagahan at sinusuportahan,” dagdag ni Mayor Biazon.
Sa kasalukuyan, ang GAD Office ay nangunguna sa iba’t ibang mga programa sa pagsasanay at mga aktibidad sa kabuhayan para sa LGBTQIA+ community sa Muntinlupa.
Ipinagdiriwang ng Muntinlupa ang Pride Month sa pamamagitan ng iba’t ibang aktibidad, kabilang ang health and wellness day, seminar tungkol sa sexual orientation, gender identity and expression, at LGBT Congress 2024.
Nagpulong kamakailan ang Bahaghari Advisory Council, na binubuo ng mga miyembro mula sa iba’t ibang sektor, upang talakayin ang mga inisyatibang ito.
About The Author
